Nyingget

Rika pada mangsan udan kudu waspada, hawa sing maune panas neng mangsan ketiga siki mulai adhem, marakna sendi pada linu, sikil adhem, awak nggigil nahan adhem.

Perubahan kaya kuwe mesthine tekan sel sel njero awak sing paling cilik mengkeret. Ana sing merga adhem weteng dadi kram, ana merga adhem ginjele kontraksi, ana merga adhem wong meteng melu kenceng wetenge. Uga liyane, mulane awake dhewek kudu dibantu hawa anget ora ketang jaketan angger numpak motor ben bisa mbantu organ ora kadhemen.

Angger kepanasen marakna penyakit beat stroke nganti semaput merga dehydrasi, semana uga adhem nemen bisa marakna hypothermia. Utamane wong tuwa karo bayi sing angel nampa perubahan drastis cuaca kudu dibantu kepriwe ben awake kuat nahan perubahan. Kabeh kudu waspada, dadi bisa nyingget dana duit harta sing kudune bisa kanggo kebutuhan liyane, bisa nyingget ora nggo mragadi merga lara neng rumah sakit.

Mangsan udan uga marakna lembab, marakna jamur pada tuwuh neng tempat lembab, sporane bisa maring ndi bae termasuk pernafasan marakna serangan asma ora mung adheme thok tapi infeksi merga jamur. Ana uga sing hawa adem marakna gidhuen utawa penyakit kulit liyane metu. Tengu uga pada metu sekang tempat tempat sing lembab, nempel neng kulit pada gatel gudhigen lan liyane. Mulane nek bisa mangsan udan kaya kiye waspada priwe carane nganggo klambi garing terus.

Banyu uga kudu diusahakna aja ngecembeng, marakna bisa nggo umah lemud. Rika kudu telaten angger ana banyu sing ngecembeng kepriwe carane disatna, bak mandi sering kudu dikuras, ben padha garing ora nggo umah lemud utawa liyane.

Tanah sing becek uga marakna ndog bakteri gampang pindah maring kulite dewek, akeh pada kelalen kecekel tangan mlebu tutuk pas maem kelalen ora wisuh. Kedadian kaya Kuwe bisa nular njur dadi kedadian luar biasa, njur pada dadi penyakit sing bisa bareng bareng ngenani warga, dadi wabah.

Kabeh angger rika pada gelem brayan, bakale rika pada bisa nyingget apa bae. Urip gotong royong kuwe ora mung budhaya neng desa, tapi sejatine prinsip neng tata kuripan neng organisasi apa bae. Menungsa ngerti dalan lubang kudune dibantu priwe nutup aja mung nyalahna pemerintahe, ana alat neyeng ya jajal dibersihna bareng, jenenge mbantu ora banjur nyalahna sapa sing tuku ora becus. Urip suudzon ora marakna kreatif ning malah njerumusna pikiran cupek.

Mayuh pada mulai urip khusnudzon, jujur, rembugan sing apik, brayan. Aja seneng takon karo wong sing salah, takon sega goreng karo tukang bakso, takon penyakit medis maring dukun, takon hal ghaib maring dokter, akhire kewolak walik merga ora duwe prinsip uga pikiran ati jembar. Wong sing mikir sebab akibat ning ora butul ilmune sering marakna pitakonane mbingungi dhewek. Kabeh pitakonan neng ndunya pancen bisa dijawab karo pikirane wong menurut kepercayaane dhewek dhewek.

Ning ajalali ana alif laam miim, ana ya siin uga liyane, sing ora perlu kudu ngerti artine, kabeh mau ben menungsa nyingget goli mikir, goli usaha uga liyane merga menungsa duwe bates . Gusti Allah wis ngemutna awake dhewek, aja ngliwati bates nek ora ngerti ilmune. Nek wong wis ngerti wates, marakna ngerti priwe carane kreatif neng wates wates kuwe, dadi ora seneng nabraki kepentingan wong liya. Kelilaan. (*)

Beri komentar :
Share Yuk !