Mangsan udan lur, akeh semut pada pindah sekang panggonan adhem njero lemah, munggah ngliwati gedheg munggah maring sela sela penglari ben olih udara anget, mengko titimangsane mangsan panas pada regudugan pindah ngisor lemah maning.
Semut bae pinter nglindungi awak sanak kadang sekang kondisi alam nganggo cara migrasi sedhela, ngumpet pindah golet aman. Apamaning rika pada menungsa sing ngerti kuwe mau babagan semut sing disebut ayat kauniyahe Allah SWT, semana uga rika mahami korona, paham apal jipal babagan ngindari karo nyegahe, senajan carane bedha bedha sekarepmu, seyakinmu, seporetmu, ngepasna ilmune dhewek-dhewek.
Nek mbahas perpindahan, neng babagan kerja ana sing diarani mutasi, bedane karo migrasi kuwe anu karepe dhewek, nek babagan mutasi anu dipindah kerja merga dianggep ora mampu neng atasan adidasar data. Dadi pejabat ora teyeng kreatif. Ora teyeng komunikatif, ora teyeng aweh solusi, ora teyeng gawe dokumentasi, ora bisa gawe laporan ya jenenge ora becus, mulane mending dipindah ben sinau maning sebabe apa dipindah.
Kerja kudu cepet uga bisa diwei biji neng kepegawaian njur tekan direktur di verifikasi karo babagan efisiensi tunjangan gaji struktural, ben ngerti sebabe apa dipindah merga pimpinan butuhe ora dipenuhi, ora usah gela, ora usah dendam merga kuwe proses ndunya, wong ngatur babagan loyalitas uga kompetensi.
Babagan ilmu biomedis, kedokteran, kesehatan tekan babagan sel, perubahan kondisi sel uga jaringan sing kedaden neng makhluk hidup jenenge mutasi. Mulane ana mutasi gen, mutasi bakteri, mutasi virus, Kabeh mau merga nyesuekna perkembangan jaman. Rika pada jaman ganu nek mangan sayur disemprot pada mabok keracunan, jaman siki kabeh sayur buah disemprot insektisida, herbisida uga liyane, rika pada tetep urip ning pada kenang kelainan, sekang sel tekan organ tubuhe. Kuwe mau contoh mutasi merga perubahan gen neng makhluk tekan uga mutasi virus jaman flu tekan corona siki.
Kedadian perubahan neng ndunya rika pada ngerti sekang kedadian siklus uripe menungsa, mulai sekang sel telur rama biyung, dadi janin, dadi menungsa, tiwas banjur mati dikubur nganti dibangkitna maning neng alam seteruse, kuwe mau wis biasa. Pergulatan sel sperma ramane dewek sing cacahe puluhan ewu bae sing kasil dadi awake dewek mung siji thok, liyane mati kentekan tenaga ora tekan tumuju sel telur sekang biyunge dewek.
Wis ketemu bae goli nempel neng dinding rahim biyunge dewek akeh sing ora dadi, ora teyeng akhire ora dadi menungsa kaya awake dewek. Awake dewek bisa urip mulai sekang ari ari, nyusu dibantu nganti mlaku njur tekan kawin duwe anak putu maning uga seteruse. (*)
Ngerti kisah kaya kuwe, mula ora usah gumunan ana korona, merga virus uga nduwe cara urip. Ora teyeng urip neng alam biasa kaya dewek, bisane nunut neng makluk urip maning liyane sing duwe getih urip, cairan urip, njur mlebu tekan sel mateni kekebalan awake dewek. Cacahe ewon berkembang biak urip neng njero sel awake dewek, nganti sel pertahanan awake dewek ora kuwat, jaringan rakuat, organ rakuat banjur awak rakuat, njur gantian dewek sing mati. Ning nek dewek nganti sel pertahanan tubuhe kuat, ya kenaha dadi orang tanpa gejala (OTG). Persis kaya rika pada sing kenang TBC, kenang penyakit liyane. Rika pada ngerti wis kepriwe carane ngatasi, carane dhewek-dhewek nganggo pikiran dhewek, merga wong siji liyane wis pinter kabeh, dadi kabeh ilmu, nalar uga liyane bisa bae kalah karo karep awake dewek dewek. Mugaha sing dipilih awake dewek padha ora ngrugikna wong liya. Kelilaan.
